Hezkuntza komunitatea Whatsapp taldeekin erabat aztoratuta dagoen honetan, Telegram aurkeztu nahi nizueke. Gure jardueretarako interesgarria izan daiteke hainbat arrazoirengatik:

• Posible da telefonoaren zenbakia ezkutatzea. Horrela, familiekin eta ikasleekin harremanak izan ditzakegu gure zenbakia agerian utzi gabe (kontaktuetan telefono zenbakia gordeta badago, orduan bai azalduko zaigula).
• Kanalak sor daitezke, mezuak zabaltzeko modu masiboan. Ezaugarriak:
  • Bertan argitaratzen denean, mezua kanalaren izenean doa, ez norberarena.
  • Administratzaile bat baino gehiago egon daiteke kanala bideratzeko.
  • Ezabatutako mezuak denentzat ezabatzen dira, ez bakarrik norberarentzat.
  • Partaide berriak sartzen direnean, mezuen historia guztia ikus dezakete.
• Argazkien inguruan:
  • Ez dago mugarik nahi ditugun argazki guztiak bidaltzeko
  • Argazkiak molda daitezke aplikazio berean, efektuak jar daitezke.
  • Argazkiak denbora mugatu batez ikusteko marka dezakegu.
  • Galerian ez dauden argazkiak bidal ditzakegu aplikaziotik atera gabe.
• Webgunearen bidez erabil daiteke eta ordenagailuan dugun edozein artxibo bidal dezakegu: pdfak, aurkezpenak… 1.5 Gb arte izan daitezke edo lainoan (Dropbox, Drive, icloud) ditugun dokumentuak.
• Bilatzaile indartsua: gogoan baduzu elkarrizketaren zati bat, berehala bilatuko dizu.
• Gailuaren arabera, txat/mezu ezkutuak. Denbora bat marka dezakegu mezu, artxibo… bat ikusteko eta gero desagerrarazteko. Pantallaren argazkia eginez gero, abisoa bidaltzen du.
• Pribazitatea
• Whatsappak baino gutxiago okupatzen du.
• Botak erabil daitezke inkestak sortzeko, alertak egiteko… adibidez @ImageBot, @AlertBot, @StoreBot, @PollBot, @Triviagram, @Weatherman, @GifBot, @HanBot …

Erabiltzeko asmoa badugu, komeni da argi izatea zertarako izango den; noiz-nola erabiliko dugun eta zuzendaritza taldearen babesa izatea, hala nola Eskola Batzordearena; IUPn aipatuz gero, hobeto.

Ikasleekin erabiltzea oraindik ez dago garbi, eskarmentu gutxi daude. Erabilera okerraren aurrean, hitz egin eta hausnartu behar da akordioak lortzeko. Honetan ere, debekatu baino gehiago, erabilera egokian hezi behar ditugu ikasleak. Argi izan behar dugu gaur egun tresna hauek eskura ditugula eta gero eta gehiago erabiltzen ditugula denok.

Probatzera animatzen bazara, ez galdu kanal hauek: Hezkuntzan ere librezale https://t.me/hezkuntzanlibre eta Educanales https://t.me/Educanalgrupos

Ikasturte honetan zuzendaritza utzi dut eta lanpostu berri batean hasi naiz. Orain Donostiako Berritzegunean nabil, IKT arduraduna. Atzean zuzendaritzaren dispertsioa utzita, aurrean beste ardura mota bat daukat. Oraindik ez dut garbi non sartu naizen, gai izango ote naizen erronkei era egokian erantzuteko. Saiatuko naiz, behintzat!

Bitxia da gure lanbide honetan, gehienak emakumeak izanda, zenbait lanpostutan hain emakumezko gutxi egotea. IKT arduradun gehienak gizonezkoak dira, bai eskoletan, bai Berritzeguneetan, bai erabakiak hartzen. Aurreko astea, adibidez, moodlemoot bilera egin zen Gasteizen. Partehartzaileen artean, kopurua nahiko antzekoa zen; emaileak, aldiz, gehienak gizonezkoak. Bitxia izan zen hizlarien artean ikasleen zaintza aipatu zenean, emakumeen ahotik etorri zen. Nolabait, emakumeak oholtza gainean egon zirenean, gaiak horretarako ematen zuen, ez zen “teknikoa”. Ezin dut ezer kritikatu, nik neuk ere, ahal den guztietan, entzun nahiago dut ekin baino.

Bestalde, egun hauetan Telegramen Hezkuntzan ere librezale izeneko talde bat martxan jarri da. Gure ikastetxeetan Google Suite hartzen ari den nagusitasuna kezkatzeko modukoa da eta horren aurrean nola jokatu aztertu beharko genuke. Niretzat latzena izan da, konturatu gabe, inertziak eramanda, azken bolada honetan hausnartzeko denbora gutxi hartu dudala eta uste nuena baino denbora gehiago beharko dudala fundamentuzko proposamen bat egiteko ibilbide berri honetan.